Aurten bigarren aldiz, Berako Labiaga ikastolak Lore Jokoak antolatu ditu. Aurtengoa egitaraua motzagoa izanen da baina lehengo urtekoa bezain interesgarria. Izan ere, programatutako iharduerak, euskal kulturarekin erlazionaturik daude: euskal jokoak, dantzak eta hitzaldia bertzeak bertze.
Aurten Lore Jokoak bi egunetan garatuko dira. Alde batetik irailaren 17a, larunbata, egun nagusia izanen da. 11:00etan errekaren garbiketa eginen da Kaxerna Gaztetxeko kideen eskutik. 12:00etan toka txapelketa eginen da bikoteka. 13:00etan gaiteroekin kalejira eginen da Eztegarako ikastolatik Ilekuetaraino. 14:00etan, 2010-2011 ikasturteko bideoaren emanaldia eskainiko da. Lehengo urteko giro aparta errepikatzeko asmoz, 14:30ean ikastolaren bazkaria eginen da Altzateko frontoian. Izena emateko epea asteazkenean, irailaren 14an bukatuko da. Bazkarirako txartelak ikastolako idazkaritzan eros daitezke. Helduek 16 euro ordaindu beharko dute eta haurrek 7 euro. Aurten ere, Lore Jokoei giro egokia emateko, inguratzen diren guztiei baserritarrez jantzita etortzeko gonbidatzen die ikastolak. Larunbateko ekitaldiak bukatzeko, 17:00etan dantzaldia izanen da.
Bertze aldetik, irailaren 23an Nafarroako konkistaren bosgarren mendeurrenari buruzko hitzaldi bat antolatu du Labiaga ikastolak, Nabarralderen eskutik. Beralandetan izanen da solasaldia, 19:30etik aitzinera.