Aurtengo Sanferminak pasatuta, udalak besten balorazio positiboa egin du. Herrian bizi izan den besta giroa bikaina izan dela erran du Bilduk eta egindako balorazioa positiboa izan da, orokorrean.
Halere, segurtasun neurriak hobetzearen beharra azpimarratu nahi izan dute, «2.800 biztanleko herri bat izanik, Sanferminetako asteburuan 10.000 biztanleraino iristen gara. Honek eguneroko normaltasuna hautsi egiten du, gehiago kontrolatu beharreko egoerak sortuz, hauen artean segurtasuna eta garbitasuna». Honek duen garrantziaz ohartuta datorren urtera begira neurri zorrotzago eta hobeak aztertuko dituzte.
Udalaren egoera ekonomiko larriak garbitasunean gastuak moztea ekarri du eta argi azaldu dute aurten hartu diren garbitasun neurriak ez direla nahikoak izan, «asteburuan etortzen den jende kopurua ikusita, ez da harritzekoa sortzen den usai txar eta zakar kopurua, eta jarritako garbitasun neurriak ez dira nahikoak izan honi irtenbide egokia emateko». Herritarrei barkamenak eskatu dizkiete izandako «ondorio desatsegin eta zailengatik». Bide batez, herriko txokoak norberaren borondatez garbitzen lagundu duten herritar guztiei eskerrak eman nahi dizkie udalak.
Aipamen berezia egin nahi izan die programa ofizialetik kanpo herrian giroa jarri duten talde desberdinei eta programa ofizialean hainbat ekitaldi aurrera eramateko lanean aritu diren bolondresei ere. Datorren urtera begira, besta komisioa sortu nahi dute «Sanferminetarako ekitaldi hobeak, hurbilagoak eta parte hartzaileagoak sortzeko asmoz».