Aintzineko agintaldiko ohiturari eutsiz, berriki estreinaturiko udal taldeak, udal informazioa etxez etxe banatu du. Berrietan tartean honako puntu hauek azpimarratzen dira.
• Medikuaren etxea.
Medikuaren etxeari dagokionez, iaz etxebizita alokatzeko aukera eman zuen udalak. Deialdian Mirari Leizak bakarrik eman zuen izena eta berari eman zitzaioan etxebizitza alokairuan. Hala ere, honen ezezkoaren ondoren, berriz ere enkante publikora atera da alokairu proposamena. Joan den ortzirala arte izena emateko aukera zegoen Herriko Etxean. Etxea alokatzeko hasierako kopurua hilabeteko 300 eurokoa izatea adostu zen joan den hilabeteko udalbatzarrean eta diru gehien eskaintzen duen proposamenak eta Arantzan erroldatua denak ere lehentasuna izanen dute.
• Auzolana.
Auzolanen ohitura eta betebeharrekin segitzea erabaki du udal berriak. Auzolanen nondik norakoak oroitarazteaz gain, auzo bakoitzetan arduradun bat izanen da:
Bordalarrean Teodoro Pikabea, Azkilarrean Felix Iparragirre, Aientsan Josetxo Taberna eta herrian Inaxio Madariaga eta Gotzon Arenas.
Informazio gehiago jakin nahi izanez gero, udaletxera hotseginez, agertuz edo zuzenean, auzolanetako zinegotzia den Inaxio Madariagarengana jo dezake herritarrak.
Nolanahi ere, helburua bikoitza dute auzolanek: herria txukun mantentzea eta, bidenabar, herriaren alde lan egitea. Beraz, 18 eta 65 urte tartean dituzten herritar guztiek, ezintasun bat dutenek ez bertze, auzolanak egin behar dituzte. Etxe edo famili bakoitzak guttienez, bortz orduko bi egun egin beharko ditu eta egiten ez duen familiak egun bakoitzeko 45 euro ordaindu beharko du. Gogoratu, auzolanetan suerta daitezkeen lan istripuak beregain hartuko dituela udalak seguru berezi baten bitartez. Horretarako, aitzinetik Herriko Etxean izena eman beharko da.