Club Ciclista Beratarra elkarteak XX. urtez antolatutako La Miguel Indurain txirrindularitza probak partehartzaile marka gainditu zuen ekainaren 25ean. Denera, 2.030 txirrindulari abiatu ziren Beratik. Horietatik 1.279k 113 kilometroko ibilbide laburra osatu zuten, tartean, Miguel Indurain berak, Marisa Lopez de Goikoetxea bere emazteak eta Miguel Indurain semeak. Bertze 751ek 186 kilometroko ibilbide luzea aukeratu zuten.
Antolatzaileek Bernard Hinault eta Eddy Merckx ere gonbidatuak zituzten, Atarrabiakoak bezala Frantziako 5 Tourren irabazleak direlako, baina ez ziren Berara azaldu. Baina bi txapeldun handiak ez etorriagatik, alde guzietako txirrindulariak ageri ziren: Frantzia, Espainia, Herrialde Katalanak, Italia...
IBILBIDE luzea
Proba luzean Xabi Aranguren igantziarra nagusitu zen (05:15:32). Sopuertako Rafael Perez San Jose eta Iruñeko Eñaut Otxoak osatu zuten podiuma. Aipagarria da Luciano Mitxelena lesakarraren lana: 55-64 urtekoetan erraz irabazteaz gain, 19. izan zen sailkapen orokorrean. Emakumezkoetan, hiru bakarrik ausartu ziren ibilbide luzea osatzera. Horien artean, Basauriko Virginia Lotina nagusitu zen (06:52:07). Paula Gonzalez bilbotarra minutu eta erdi beranduago helmugaratu zen eta Zumarragako Nekane Lasa 20 minutura.
Ibilbide laburra
Proba laburrean, Gernikako Antonio Alcañizek iaz galdu zuen 2008tik zeukan marka, baina aurten marka berria ezarri du (02:54:26). Sprintean, Ikaztegietako Anjelmari Acedo eta Iruñeko Jochen Krügermeyerri nagusitu zitzaion. Joan den urtera arte ez zuen inork hiru ordu azpitik egin ibilbide laburra, baina aurten 45 lehenbizikoek lortu dute. Emakumeetan, Ana Monreal iruñearra izan zen garaile (03:21:50) eta kasik 9 minutuko aldea atera zien Idoia Mujika eta Ainara Pacheco gipuzkoarrei.