Urtero bezala, San Ferminen aitzineko asteburuan, denboraldi bukaerako jaialdia antolatu zuen Lesakako Arkupe pilotazale elkarteko pilota eskolak.
Iñaki Arretxea eta Tomas Otxotekoren erranetara, 4 urtetik 14 urtera bitarteko 33 bat mutiko aritu dira aurtengoan, eta horien lana erakusteko jaialdia egin zen uztailaren 2an, larunbat arratsaldean udal pilotalekuan. Ttikienak punttuan aritu ziren eta gero, binaka nahiz buruz buruko partidak jokatu ziren. Bera eta Igantziko pilotariek ere parte hartu zuten jaialdian.
Behin partidak bukatuta, pilotari guziek oroigarri bana jaso zuten. Horretarako, espreski etorri zen Leitzatik Abel Barriola pilotari profesionala. Berekin batera, Santiago Oiartzabal Arkupe elkarteko presidenteak eta Peio Etxabide Lesakako alkateak eman zituzten sariak, mutikoen pozerako.