Gazte gaztetatik haurrek elikadura eredu osasungarri baten berri izan dezaten, Aiala Zubieta eta Marga Matxiarena herritarrak izan ziren Labiaga ikastolarari beraien baratze ekologikoarekin lanketa bat egitea proposatu ziotenak: «garrantzitsua iruditzen zaigu umeak ttikitatik ingurumen gaietan egoki hezitzea eta hor ikusi genuen Euskal Herrian ekonomikoki nahiz soziokulturalki hain garrantzitsua izan den nekazaritza umeei hurbiltzeko aukera. Helburua umeak ongi pasatuz eta naturarekin kontaktuan egonik, gai hauetan sentsibilizatzea da. Ikastolari proposatu genion ea gurekin lanketa bat egin nahi ote zuten eta erantzuna baiezkoa izan zen», kontatu digu Zubietak.
Maiatz aldera hasi ziren ikasleekin lanean. Lehen Hezkuntzako ikasleekin lau saiotan banatuta dagoen urte osoko proiektu bat dute eskuartean, urtaro bakoitzeko bat. «Helburua, ikasteaz gain, ongi pasatzea denez, baratzera eramaten ditugu ikasleak. Hasieran azalpen batzuk ematen dizkiegu urtaro horretan baratzean egiten denari buruz, eta gero, beraiek praktikan jartzen dute». Hala, letxugak landatu edota lekak ereiteko aukera izan dute. Hori bai, beti «pozoien ordezko bertze alternatibak praktikan jarriz». Eta gerora, uzta jasoko dute, eta hazitegiak egin eta zaindu. Eta DBHko ikasleekin, ikastolan egin dute saioa, azalpen eta jolasen bidez baratze ekologikoa nola egiten den esplikatuz. Baratzean ere ibili dira guztia praktikan ikusteko.
Orain arte eginikoarekin kontent dago Zubieta. Are gehiago, ikasleek «hagitz harrera ona» izan dutela kontuan hartuz. «Bi taldeak adi egon dira eta joko, praktika eta edozein galdera egiterakoan parte hartu dute. Hagitz esperientzia ona izan da, guretzat behinik behin bai».
Ikasturte honetakoa bukatutzat eman badute ere, badituzte asmo gehiago. Lehen Hezkuntzakoekin oraindik lehen saioa egin dute eta hurrengo ikasturterako hiru saio falta zaizkie. Horrez gain, «hurrengo urteei begira, bai DBH eta bai Lehen Hezkuntzakoekin ere, aukerarik bada, segitzeko asmoa daukagu». Hala erran digu Zubietak.