Altzaten 56 bizitza eta 162 aparkaleku egiteko aukera emanez, hirigintza planaren aldaketa behin betiko onartu du Udalak. Erabakiak eremu horretarako lehendik aurreikusia zegoen egitasmoan aldaketak ekarri ditu, aparkaleku eta bizitza gehiago eginen baitira.
Lehenago, Babes Ofizialeko sei etxebizitza aurreikusiak zeuden eta onartu berria den plan aldaketarekin, guttienez 18 eginen dira eta etxebizitza kolektibo libreak 38 izanen dira –lehen 18 ziren aurreikusiak–. Altzateko aparkaleku arazoak moldatzeko, aparkaleku kopurua ere igo eginen da. Guztira 88 aparkaleku publiko eta 84 pribatu eraikitzeko asmoa dago –lehen 86 publiko egitea zegoen aurreikusia–.
Josu Iratzoki alkateak adierazi digunez, «erreka bazterrean eremu berde zabal bat eginen da eta eremu hau Altzate karrikarekin lotzeko oinezko bide bat ere bai». Zubi batzuk ere aldatu beharko direla gaineratu digu alkateak, uholdeen ondorioz sor daitezkeen arazoak ttikitzeko. Bajuetan bizitzak ere izanen dira eta «ez da bajo komertzialik aurreikusi».
Bertzalde, lehen zortzi bifamiliar eraikitzea aurreikusia zegoen, baina aldaketa onartu ondotik, ez da bakar bat ere izanen.Hori izan baita aldaketaren oinarria. «Herrigunea ez genuen egokia ikusten etxebizitza bifamiliarrak eraikitzeko, lur aunitz okupatzen dutelako eta ez delako eredu jasangarria herrigunean egiteko. Hauen salneurria ere hagitz altua da. Horren ordez, bizitza dentsitate gehiago sartu da, lurra hobeki aprobetxatzeko asmoz», azaldu digu Iratzokik.