Azken urteotan ohi denez, Bortzirietako Euskara Mankomunitateak udaleku irekiak antolatu ditu, Dindaia Fundazioarekin batera. Arantza, Bera, Etxalar eta Igantzin udalekuak uztailaren 4an hasiko dira eta 29ra arte ariko dira. Lesakako kasuan, udalekuak uztailaren 11n hasiko dira eta abuztuaren 5ean bukatu. Herri guztietan, astelehenetik ortziralera izanen dira, 10:00etatik 13:00etara.
Adinaren arabera bi eskaintza izanen dira: batetik, 3-7 urte bitartekoek udalekuetako ohiko ekintzak izanen dituzte. Bertzetik, 8-12 urte bitartekoentzat adin tarte horri egokitutako sormen tailerra izanen dituzte.
Izen-ematea
Izen-ematea zabalik dago eta ortziral honetan, hilak 27, bukatuko da epea. Interesatuek Dindaia Fundaziora deitu beharko dute (948 266240, 10:00etatik 15:00etara) edo e-postaz uda@dindaia.com-era idatzi.
Ume bat apuntatuz gero, 75 euro balio du; bi anaia-arreba baldin badira, 130 euro; hiru anaia-arrebekin 165 euro. Taldea sortzeko beharrezkoa izanen da herri bakoitzean guttienez zortzi lagun apuntatzea.
Neska-mutikoei udako oporraldietan eta aisialdia bezalako eremu informal batean euskaraz gustuko dituzten ekintzak eskaintzea da udalekuen helburu nagusia. Baina horrekin batera, funtzio sozial bat ere betetzen dute, kanpoan lan egiten duten gurasoei aukera bat eskainiz.