Maiatzaren 18an, asteazkena, Berako Aralarrek zerrenda eta programa aurkeztu zituen Beralandetan. Marisol Taberna zerrendaburuak udalean egon den talderik aktiboena izan direla erran zuen. Inbertsioetan zein programetan ezkerreko izaera markatu ahal izan dutela. Krisiari ezkerretik erantzuteko beharra nabarmendu du
Tabernak, hezkuntzan sakonduz, industria plan bat garatuz eskualde mailan, eta langileen aldarrikapenak defendituz. Hurrengo lau urteetarako orain arteko politikei segida ematea eta indartzea dela helburua azpimarratu zuen. Horrez gain Aralarrek Berako Udalean elkarlana, herritarren parte hartzea, gardentasuna eta austeritatea bultzatuko dituela erran zuen.
Ondoren Jon Abril Berako zerrendako bigarrenak eta alderdiko korrodinatzaileordeak hitz egin zuen. Euskal Herriak bere etorkizuna erabakitzeko "abertzaleek gehiengoak batzea" beharrezkoa dela nabarmendu du. Mikel Basabe legebiltzarkideak ere eman zuen hitzaldia.