Maiatzaren 19an ateraldia antolatu du San Fermin Elkarteak. 08:00etan abiatuko dira Lesakatik eta bidean gosaldu ondotik, Lizarra bixitatuko dute eta egun horretan azoka izaten dela ere aprobetxatuko dute. Handik Barindanora joko dute eta Urederraren sorbururaino txangoa eginen dute. Bazkal ondotik, Urbasa eta Altsasun barna Lesakara bueltatuko dira. Bidai honetarako eta egun horretako bazkarirako txartelak 20 eurotan salgai daude maiatzaren 15era bitarte. Dena den, aitzinetik autobuseko lekuak betetzen badira, orduan itxiko da izen emate epea. Bertze aldetik, maiatzaren 24 eta 25ean, elikadurari buruzko solasaldiak antolatu ditu San Ferminek, Sandra Legasa dietistaren eskutik. 17:00etatik 18:00etara eginen dira saioak egoitzan. Bertan parte hartzeko interesa dutenek lehenbailehen eman beharko diote izena ostatuko arduradunari.