Bidasoko Lehenbiziko Izokina ateratzeko ez da aunitzik esperatu behar izan. Hondarribitarra sortzez, baina aspaldiko urteetan Berako Zalain auzoan bizi den Joxe Mari Mitxelena Urrestarazu arrantzaleak 6,400 kiloko pisua eta 84 zentimetroko luzera zuen izokin arra eta basatia (errepoblaziorako izokinei egiten zaien markarik gabekoa) atera zuen arrantza denboraldia irekitzen zen egunean, maiatzaren 1ean, 09:30ean. Lehenbiziko trepan, presa eta Artxabal artean atera zuen ale ederra.
Mitxelenarentzat hirugarren Lehenbizikoa izan da aurtengoa. Lehen egunean arrantzale aunitz ikus zitezkeen Endarlatsa inguruan, bere txandaren esperoan. Juan Otamendi eta Fermin Martinez Martiarena, Berako Ehiza eta Arrantza Elkarteko presidenteak eta idazkariak eman zioten Lehenbizikoaren garaikurra Joxe Mari Mitxelenari. Gainera, izokinarentzako eroslea ere topatu zuen. Igeldoko Rekondo jatetxeko Txomin Rekondo Endarlatsan zegoen, bera ere izokin arrantzalea baita eta saldu daitekeen izokin bakarra erosi zuen. Duela bi urte Iruñeko Hartza jatetxeak monopolizatzen zuen Bidasoko lehenbiziko izokinaren erosketa, iaz Donostiako Urola jatetxeak eskuratu zuen eta aurten Igeldora joan da izokina. Izokina modu aunitzetara prestatzen ahal dela ere aipatu zigun Rekondok, «eta denak goxoak».