Egun osoko egitarauarekin mozorro besta joan zen apirilaren 9an. Eguerdian bertso pilota jokatu zen. Pilotan, Joseba Pikabea eta Beñat Mitxelena batetik, eta Joseba Madariaga eta Xabi Elizalde bertzetik aritu ziren. Partida borrokatuan, bertsoak tartekatu ziren, Jon Maia eta Jexux Mari Irazu botillero zirela. 16ra jokatu zen partida… eta 15na zihoazenean, Maiak eta Irazuk pilotari ekin zioten. Irazuk lortu zuen azken tantoa. Ondotik, aizkora apustu ederra izan zen: Julio Lukanbio eta Joseba Otaegi batetik, eta Xabi eta Oihan Larretxea bertzetik. Saio parekatua egin zuten eta ia batera bukatu zuten. Ondotik, 60 bat lagunek bazkaldu zuten Aterpean, giro onean eta bertsolariekin bazkalondo umoretsua izanez. Ilunabarrean, PelleTtikiren aldeko zozketa egin zen eta gauean, Laja eta Alabierrekin dantzaldia izan zen.