Zortzigarren urtez jarraian, Euskara Batzordeak Udaberriko Bestak antolatu zituen apirilaren 15, 16 eta 17rako. Ekitaldiak ez ziren ongi hasi, izan ere apirilaren 15erako antolatua zen bertso afaria ez zen egin, jende guttik izen eman zuelakoz. Larunbatean, berriz, eguraldia lagun, primeran atera zen haur eta gurasoen mendi irteera. 10:00etan plazatik abiatu eta Isatsandiko luberriraino joan ziren 25 bat lagun. Gosaldu eta eguerdirako herrian ziren bueltan. Arratsaldean, eskolan hainbat ekitaldi izan ziren. Ikasleek eskolan egindako hainbat lan erakutsi zituzten eta bukatzeko, hirugarren ziklokoek bertso ipuinak antzeztu zituzten. Izan ere, aurten ikasturte guztian bertsolaritza lantzen ari dira Estitxu Arotzenarekin.
Eskertza
Aurten, hirugarren aldiz, etxeko produktuekin eta bigarren eskuko puskekin osatutako merkatua antolatu du batzordeak. Kasu honetan, bildutako dirua herriko dantza taldearentzat izan da. Aitzineko bi edizioak hagitz arrakastatsuak izan dira, eta hirugarren honetaz ere gauza bera erran behar da. Goizetik hasita, txistulariek herriari buelta eman zioten, herritarrak girotzeko. Eguerdi aldera dantzari ttikienek saio bat eskaini zuten, eta arratsaldean herriko trikitilari eta pandero joleak aritu ziren.
Antolatzaileak hagitz kontent agertu dira merkatuaren emaitzekin. Hasteko, antolaketan parte hartu duten guztiei eskerrak eman nahi izan dizkiete: aitzinetik etxez etxe puskak biltzen nahiz egun berean merkatua prestatzen, saltzen eta biltzen aritu diren guztiei, eta opilak egin dituztenei. Etxean egindako produktuak eta gainerako puskak musutruk eman dituzten herritarrei eta herriko ostatuei (zozketarako eman dituzten otorduengatik) ere eskerrik beroenak eman nahi izan dizkiete: «urtetik urtera errazagoa izaten ari da merkatu hau antolatzea, preziski denek duten borondateagatik».