Herriko gazte batek guardia zibilengandik jasandako tratu bortitza salatu zuen Udalak ahobatez martxoaren 24an egindako agerraldian. Alkateak aipatu zuenez, «gazteriak pairatzen dituen mehatxu, presio eta jazarpenak ugaritzen ari dira, baina oraingoa bezain larririk ez da gertatu edo ez da salatu behinik behin». Gazteak salaketa ere jarria du guardia zibilen kontra epaitegian. Horren arabera, otsailaren 3an, 18:45 aldera etxera bizikletaz zihoala guardia zibilaren kontrola ikusi zuen kuartel pareko errotondan. Etxeko portalean sartu zenean, guardia zibil batek kaputxatik heldu eta arrastaka atera zuen portaletik. Behin kanpoan, eskuak paretaren kontra jarri zuten eta sakelak, kartela, motxila miatu zizkioten. Baina Nortasun Agiria aztertzen ari zirela, Berako kuarteleko bi guardia zibil hurbildu eta gazteak Berako kontzentrazioetan parte hartzen zuela erran zieten bertze agenteei. Momentu horretan, portaleko atea irekitzea agindu eta barnera sartu zuten gaztea, ondoan bi guardia zibil, eskaileretan bertze bat eta atearen kanpoaldean bertzea, inor etxean sar ez zedin. Agenteetako batek metraileta luzearekin apuntatu bitartean, bertzeak laburrarekin mehatxatu zuela salatu du gazteak eta erabat biluztu eta metraileta puntarekin gorputz osoan jo zutela. Hala, guardia zibilen indarkeria guztiak desagerrarazi behar direla eskatu du Udalak ahobatez onartutako mozioan.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun