Proiektu berri bat lantzeari ekin diote eskolan: baratzea. Iaz lur eremua eskatu zioten Udalari eta aurten guraso, irakasle eta ikasleek eginen dute lana: guraso boluntario batzuen artean baratzeko pareta altxatu, lur beltza eta gorotza ekarri eta lurrean bota zuten. Eta ikasle eta irakasleek lurra aitzurrarekin landu, gorotza zabaldu eta baratzeari itxura emanen diote: bidaxkak egin, loreak paratu, mugak zehaztu, pareta margotu, ureztatze sistema jarri eta landareak landatu.
Aurten, lehenbiziko urtea denez, barazki gutti paratzeko asmoa dute: letxugak, azenarioak eta tipulak. Helburua ikasle bakoitzak barazki bat etxera eramatea edo jantokian bazkaltzen dutenek bertara eramatea da. Baina horren gainetik, xede nagusiak landareen mundua hurbiletik ezagutzea, errespetu ekologikoa lantzea, baratze batean lan egiten ikastea eta landare baten bizitzaren gorabeheren berri izatea dira.