Hilabete honetan, Gasteizen aurkeztu du bere lehen komiki erakusketa Joseba Larratxe gazteak (Bera, 1985), Umore Zintak marrazten saiatu zen komikilaria izenburupean. Arkitekturan inertziaz sartutakoa, modu paraleloan eraman ditu ikasketak eta komikigintza. Ez daki etorkizunean arkitektoa izanen den, baina badaki komikiak beti marraztuko dituela. Matrakan, Nabarran, IKAren aldizkarian eta Aldiri arkitektura aldizkarian egiten ditu kolaborazioak marrazkilari honek.
KOMIKIEN EGOERA
«Umore zinten osasuna komikiena baino hobea da. Euskal Herrian komiki zintetan tradizioa eta segida badago. Komikigintzan, berriz, egoera ilunagoa da. Herri ttikia gara eta ezin zaio eskatu mundu mailan hagitz minoritarioa den arte bati Euskal Herrian hobeto egotea. Zaletasuna handitzen ari bada ere, komiki gutti egiten ditugu».
Lehenagotik egin izan duzu erakusketarik?
Orain dela gutti nik egindako bideoklipen proiekzio bat egin genuen Irungo ostatu batean. Hori izan da jende aitzinean aurkeztu dudan lehen proiektua. Baina komikigintzan hau da lehena.
Nolatan sortu zen erakusketa egiteko ideia?
Aurten Korrika ospatuko denez, Gasteizko AEKn lan egiten duen lagun batek proposatu zidan Korrika Kulturalaren barruan erakusketa egitea. Zinta batzuk prestatzen joan nintzen, batzuk lehengoak, bertzeak oraingoak, erakusketa osatu arte.
Betidanik marraztu izan al dituzu komikiak?
Komigintzan aspaldi hasi nintzen. Euskal Herriko hainbat komiki lehiaketetan hartu nuen parte. Ondotik eman nuen zintak marrazteko pausoa.
Nolakoa izan zen urrats hori?
Berriak argitaratzen zuen Matraka gehigarrian egin nituen lehen kolaborazioak. Umore zintak eskatu zizkidaten eta orduan moldatu behar izan nuen formatu motz eta azkarragora. Inoiz ez nituen umore zintak eginak. Moldatzen joan eta pixkanaka, hainbat aldizkaritan kolaboratzen joan naiz.
Zein desberdintasun dago komikitik umore zintetara?
Komikiak era artistiko batean lantzen uzten dizkizu bai marrazkiak eta baita zabaldu nahi diren mezuak ere. Zinten formatua ttikiagoa denez, dena murriztu egiten da.
Umore zintak marrazten saiatu zen komikilaria izenburua du erakusketak. Horrela definitzen duzu zure burua?
Saiatu hitz hori nahita jarrita dago izenburuan. Izan ere, umorea ez diren bertze tono eta gai batzuk ere lantzen ditut, batzuetan umorea egiteko saiakera egin behar izaten baitut. Mikel Laboa hil zenean, adibidez, zinta bat eskaini nion omenaldi moduan.
Zein mezu iristarazten dizkiozu jendeari?
Zintekin gaurkotasunaren alderdi batzuk azaltzea izaten da helburua. Jendeari alarma piztea. «Adi! Begira zertan dabiltzan!» esatea, beti ironia eta umore puntu batekin. Mezuak modu horretan hobeto iristen direlako. Normalean umorea gai adierazgarri eta salagarriekin egiten dut.
Nola ikusten duzu euskal komikigintzaren eta umore zinten osasuna?
Umore zinten osasuna komikiena baino hobea da. Zintetan tradizioa eta segida badago. Komikigintzan, berriz, egoera ilunagoa da. Herri txikia gara eta ezin zaio eskatu mundu mailan hagitz minoritarioa den arte bati Euskal Herrian hobeto egotea. Komiki zaletasuna handitzen ari bada ere, hagitz komiki gutti egiten ditugu Euskal Herrian.
Kklrd.com web orria ere aurkeztu duzue...
Lazaro Yak Boldo herritarrarekin batera egin dudan orrialdea da. Kafe ordu aunitzen ondotik sortutako ideia da. Bera zineman ibilia da eta bien lana uztartu dugu orrialde honen sorrerarako. Aspalditik geneukan buruan ideia bueltaka. Bien artean egindako komikiak jarriko ditugu. Lehenengoa prestatuta dago eta bigarrena ere laster zintzilikatuko dugu. Jendeari guk egiten duguna iristeko modu baliagarria iruditzen zaigulako jarri dugu martxan.
Etorkizunean komikilari izanen al zara?
Ez dakit komikilaria izanen naizen ala ez. Argi dudana da komikiak bizitza osoan marraztuko ditudala. Arkitektura bukatzen ari naiz, baina oraindik ez dakit arkitektoa izanen naizen.