Urteko kontuen berri emateko batzarra egin du aurten ere Zahar Txoko jubilatuen elkarteak. Otsailaren 27an egin zuen, eta 137 bazkideetatik 32 bildu ziren. Iazko ekonomia izan zuten hizpide eta eskaintzen diren zerbitzuen errepasoa ere egin zen:
• Eguneroko bazkaria etxeetara eramateko zerbitzuak hagitz erantzun ona du. Joan den urtean 4.000 bazkaritik goiti banatu ziren. Zuk aukeratu, zuk erabaki ekimenari esker ematen da zerbitzu hau.
• Ohatze artikulatu, gurpil-auki eta gisako tresna aunitz ere banatu dira Zahar Txokoren bidez, eta Martin Legarrak adierazi digunez, «jendea hauen beharrean somatzen dugu erabat». Hala, etxean horrelako tresnak bazterturik dituztenei uzteko edo errentan emateko deia egin zaie, beharra duenarentzat lagungarri izan baitaitezke.
• Lesakako Intzuri Optikarekin duten akordioari esker, bazkideek zerbitzu berezia jasotzen dute optika horretan.
• Bidaiek ere ez dute hutsik egiten, eta aurten Frantziako Bretaña, Normandia, Paris eta inguruak bisitatzeko asmoa dute ekainean. Oraindik autobusa betetzeko eserleku batzuk gelditzen dira.
Bilera ondotik, elkarrekin bazkaldu zuten eta ondotik, Beñat Mitxelena akordeoilariak alaitu zien arratsaldea.