2010eko azarotik 2011ko apirilaren bukaera arte, Ekokarneta deritzon txartela ateratzeko aukera eskainiko du Autoeskolen Konfederazio Nazionalak gidabaimena ateratzen ari direnentzako. Gidari eraginkorra eta kutsadura murrizteko helburua duen egitasmo honekin eskualdeko bi autoeskolek bat egin dute: Lesaka eta Doneztebe autoeskolek. Ekokarneta lortzeko zer egin behar den eta seguru gidatzeko eta kontsumoa murrizteko teknikak zein diren azaldu dizkigu Amaia Carrion Lesaka autoeskolako kideak.
EKOKARNETA
«Ingurumenaren alde eginez eta segurtasunez gidatzeko zer egin behar den azaltzen da Ekokarnetarekin»
NEURRIAK
«120 orduko gehieneko abiadura 110era jeitsiz eta martxa luzean, kontsumoa murriztuko da. Baina 60 kilometro orduko abiaduran eta erreboluzio haundietan, gehiago kontsumituko dugu. Abiadura berdinarekin kontsumoa desberdina izan daiteke».
Zer da Ekokarneta?
Gidari eraginkorragoa izateko edo kutsadura gutxiago sortzeko gidatzeko moduaz kontzientziatzeko Autoeskolen Konfederazio Nazionalak martxan paratu duen ekimena da, autoaren azterketa teorikoarekin batera egin beharrekoa. Bi orri ematen zaizkio ikasleari: bat hamar galdera dituen test batekin eta bertzea zozketa eta promozioen zerrendarekin. Ikasleak galdetegia bete behar du eta autoeskolak zuzendu eta zigilua eman. Hamar galderak ongi erantzuten dituenari Ekokarneta izeneko txartela ematen zaio. Ekokarnetak Fiat eta Shellek emandako sarien zozketan parte hartzeko ere balio du. Sari potoloena autoa da, baina erregaien baleak ere zozketatzen dira.
Zertan sakontzen da?
Ingurumenaren alde eginez eta segurtasunez gidatzeko zer egin behar den azaltzen du. Adibidez: motorra martxan jartzeko ez da azeleratu behar. Ibiliaz berotu behar da eta martxan jarri eta abiatzea da onena; martxa egokiak erabili behar dira, ahalik eta luzeenak. Zenbat eta erreboluzio haundiagoetan ibili, orduan eta gehiago kontsumitzen da eta lehenengo martxa ahalik eta gutxien erabili behar da. Beharrezkoak ez diren martxa aldaketak saihestu behar dira; motor balazta ere erabili behar da abiadura jeisteko, hau da, maldan behera frenatzeko martxa laburrak erabili; pneumatikoen presio egokia mantendu; gidatzerakoan abiadura konstantea mantendu; ralentia saihestu; motorra piztuta utzi beharrean, ogia edo egunkaria erostera joaterakoan motorra itzali; aire egokitua 23-24 gradutan mantendu; leihoak itxi; beharrezkoa dena baino zama gehiago ez eraman; gomendatutako oktanajea baino gutxiagoko gasolinarik ez erabili; aire iragazkia garbi mantendu eta ibilgailuaren mantentze lanak ongi egin behar dira. Gidatze teknikez gain, hainbat erregairen tratamenduak ere azaltzen dira Ekokarnetaren gidan: hidrogenoa, metanoa, bioetanola, biodiesela... Gure inguruan aukera gutxi daude, baina jendeak jakin dezan, ekologikoak eta ingurumena gutxiago hondatzen duten erregaiak dira. Teknologia berriekin ere gutxitu daitezke kontsumoa eta kutsadura. Olio motez eta iragazki berriez ere ikasten da Ekokarneta ateratzean, kutsadura murrizten dutelako.
Zer moduzko erantzuna izaten ari da eskualdean Ekokarneta?
Ez du erantzunik izan. Gaia datorrenean pixka bat gehiago sakontzen hasten gara, baina gidabaimen arrunta ateratzeko sartzen ez denez, jendeari ez zaio interesatzen; gidabaimenari dagokiona axola zaio.
Aunitz gelditzen da segurtasun eta ingurumenaren alde jendea kontzientziatzeko?
Bai. Gure esku dauden gauzak egiteko kontzientziatua dago jendea: martxa luzeak erabiltzeko, adibidez, nahiz eta gero batzuek astakeriak egiten dituzten. Baina erregai eta sistema berriak urruti ikusten ditugu, auto elektrikoa eta biodiesela esaterako.
Zer iruditzen zaizu Espainiako Gobernuak kontsumoa murrizteko abiadura muga jeistea?
Gidatzeko ohituretan sakonduko beharko lirateke neurriak. 120 kilometro orduko gehieneko abiadura 110era jeitsiz eta martxa luzean joanez, kontsumoa murriztuko da. Baina 60 kilometro orduko abiaduran eta erreboluzio haundietan, gehiago kontsumituko dugu. Abiadura berdinarekin kontsumoa desberdina izan daiteke, gidatzeko ohiturak dira.