Espainiako Hezkuntza Ministerioak antolatutako “Rutas Literarias” proiektuan parte hartzeko aukeratua izan da Berako Toki-Ona Institutua. Gaztelania eta Literaturako departamentuak aurkeztutako lan bati esker DBH 3. eta 4. mailako hogeita lau ikaslek izango dute Asturiaseko Colunga herrian astebete pasatzeko aukera.
Bertan, Leopoldo Alas “Clarín” idazlearen obrak landu eta ikasteko aukera izanen dute, ekintza ezberdinen bidez. Bidaia, martxoaren 13tik 19ra izanen da, eta Jaengo Andújar herriko “IES Sierra Morena” Institutuko ikasleekin batera izanen dute egonaldia.
Ibilbide Literarioen proiektuaren helburuen artean, bertze erkidegotako ikasleekin elkarezagutza bultzatzea da. Bortzirietako ikasleek lan ezberdinak egin behar izanen dituzte bidaian zehar; hauen artean, blog bat eta Bortzirietako aurkezpena. Bidaiatik bueltan, bertze ikasleei erakutsiko diete bertan ikasitakoa.
Aintzane Gascón eta Esther Lili irakasleekin joango dira.