Aurten estreineko aldiz, eta Euskadiko Txirrindularitza Federazioaren egutegiaren barrenean, 23 urtez azpikoen errepideko afizionatuentzako bizikleta proba jokatuko da apirilaren 10ean. Puntuagarria izanen da gainera, hemendik aitzinera Lehendakari deituko den sariketarako kontuan hartuko dena, hain zuzen.
Biltoki elkarteko bizikletazaleak eta zikloturistak arduratuko dira antolaketaz eta ibilbidea Bidasoaldeko errepideetan barrena eginen da. Oraindik zehaztu gabea baldin bada ere, badirudi segurua dela Piedadeko gaina behin edo bi aldiz igo beharko dutela txirrindulariek eta helmuga ere bertan izanen dela, Berrizaundik goiti atera ondotik.
Proba iraunkorra izatea ere eskuartean dabilen asmoetako bat da. Horretarako Lesaka eta Berako zenbait zalerekin harremanetan jarri dira Biltokikoak, herri bakoitzak txandaka antolatu dezan, inguruko herrien laguntzarekin. Oraingoz, aurtengoa Biltokik antolatuta eginen da eta ikusi beharko da gerora zer gertatzen den.