Otsailaren 18an, ortziralarekin, Kasino ostatuan, gurasoentzako bi hitzaldi antolatu ditu Bortzirietako Euskara Mankomunitateak. Erakunde horrek familietan euskararen erabilera sustatzeko egitasmo zabala du, eta hitzaldi hauen bitartez orain arte familiei banatu dien materiala eta antolatu dituen ikastaro eta saioak osatu nahi ditu. Ez da lehen aldia gisa honetako hitzaldiak antolatu dituena; abenduan, hitzaldi hauek berak antolatu zituen Beran.
Bi hitzaldi izanagatik, gai beraren inguruan arituko da Iñaki Eizmendi hizlaria. Izan ere, gai orokorra familian euskararen erabilera indartzea da, eta bi hitzaldietan horretarako baliabideak, gomendioak eta tresnak eskainiko dira.
Lehenbiziko hitzaldia 17:30ean izanen da. Guraso euskaldunei zuzendua da, eta euskaraz eginen da. Erabiliko al dute nire seme-alabek euskara? Norekin? Nolako euskara? du izenburu. Hitzaldi horretan guraso euskaldunek hizkuntzen erabileraren inguruan izaten dituzten kezkei erantzuna emanen zaie.
Bigarren hitzaldia 19:00etan izanen da. Euskaraz ez dakiten gurasoei zuzendua izanen da, eta gaztelaniaz emanen da. No sabemos euskera... ¿Cómo podemos ayudar a nuestras hijas e hijos? izenburupean, hizlariak guraso erdaldunek izaten dituzten ohiko kezkei erantzunen die.