Onartu du aurtengo aurrekontua Udalak: 5.300.839,15 eurokoa izanen da. Hasierako onespena ahobatez eman zioten zinegotzi guziek urtarrilaren 20ko udal batzarrean. Iazkoarekin konparatuz, beherakada aipagarria egin da, 700.000 euro murritzagoa den aurrekontua onartu baita. Joan den urtean 6 milioi eurokoa izan zen. Josu Iratzoki alkateak TTIPI-TTAPAri aipatu dionez, «gastu arrunta mantendu eginen da 2011n, eta aldaketa haundiena Lesaka-Bera uraren plan zuzendariaren fase bat atzeratu egin dela da».
Inbertsioei dagokienean, 2.420.845,80 euroko gastua eginen da, ondasun arrunt eta zerbitzuetan 1.302.486 eurokoa, langilego gastuetara 923.655,41 euro bideratuko dira eta transferentzia arruntetara 420.778,05 euro.
Inbertsio nagusiak
2009-2012 Lau Urteko Planaren barrenean, 2011n Udalaren inbertsio nagusienak hiru izanen dira: zati bat Lesaka eta Berako ur-hornidura irtenbide bateratuaren proiektuko lehenbiziko faserako erabiliko da, Bera eta Ibardingo saneamendua, alegia. 655.616 euroko gastua du obra honek, baina Nafarroako Gobernuak 536.326 euroko laguntza emanen du. Udalak, kasu honetan, 119.290 euro ordaindu beharko ditu.
Plaza eta inguruak, Eztegara eta Xubi-Xabaleko urbanizazioek 576.942,33 euroko aurrekontua dute, baina 437.447,35 euro emanen ditu Gobernuak eta Udalari 139.494,94 euroko gastua sortuko zaio.
Udaletxeko sotoa, behekoa eta lehenengo solairua berritzeko 767.331,52 euro gastatuko dira eta horietatik 742.914,21 euro Gobernutik etorriko dira. Udalak 24.417,31 euro gastatuko ditu.
Laburbilduz, hiru obra nagusi hauetan, 1.999.889,85 euroko gastua aurreikusia dago baina Nafarroako Gobernuaren dirulaguntza tartean denez, Udalak 283.202,29 euro gastatuko ditu proiektuotan.
2009-2012 planeko lan hauez gain, mendiko lanetan 178.100 euro erabiliko dira eta abeltzaintza azpiegitura lanetarako 61.295,83 euro bideratuko dira. Portulako presan ere 121.347 euroko inbertsioa eginen da.