La Miguel Indurain lasterketaren XX. edizioa ez da uztailean eginen, Beratarra Txirrindulari Elkartea probaren antolatzaileak lasterketa ekainera aitzineratzea erabaki baitu aurten. Miguel Indurain bezala, bosna Frantziako Tour irabazi dituzten Eddy Merckx belgiarra eta Bernard Hinault frantziarra omentzeko asmoa du Beratarra Txirrindulari Elkarteak eta azken honek ezin du uztailean etorri, preziski Tourraren antolaketa lanean burubelarri ariko delako. Horregatik ekainaren 25era aitzineratu dute proba.
Dagoeneko zabalik dagoena lasterketan izena emateko epea da. Internetez bakarrik apuntatzen ahal da, www.laindurain.com-en. 2.000 txirrindulariren mugara ailegatzean itxiko da izena emateko epea.
1992an lehen aldiz
Miguel Indurain txirrindulariaren omenez hasi ziren 1992an lasterketa hau antolatzen, eta hasierako 500 partaideetatik 2.000 lagunetara ailegatua da azken urteotan. Urte hauetan guztietan toki aunitzetako jendeak hartu du parte: Euskal Herria, Espainia, Frantzia, Herbehereak, Italia, Alemania, Belgika, Argentina...