Urtero garai honetan egiten duen bezala, Zuzendaritza Batzordea berritu du Biltoki elkarteak. 12 kidetatik sei berri sartu dira eta bertze sei atera; gainerakoek segitu eginen dute. Junta berritzearen ondotik, honela gelditu da zuzendaritza: Idoia Urtxegik lehendakari lanetan segituko du, Iban Txoperena lehendakariordea izanen da –juntan sartuberria–; diruzainak Rosa Sein –lehendik zegoena– eta Amaia Goienetxe –kide berria– izanen dira; idazkari lanetan Sonia Taberna ariko da –kide berria–, eta bokalak Jabier Telletxea, Miren Mitxelena, Xabi Almandoz, Aitor Almandoz –lau hauek lehendik zuzendaritzan zeuden–, Mari Carmen Etxeberria, Urtzi Loiarte eta Mikel Urtxegi izanen dira –azken hiruak sartuberriak–. Zuzendaritza utzi duten sei bazkideak, bertzalde, Edurne Huizi diruzaina, Nagore Txoperena idazkaria, Edurne Irigoien lehendakariordea, Joseba eta Lurdes Larzabal eta Pedro Aldabe bokalak izan dira.
Mus Txapelketa
16 bikotek hartu zuten parte urtarrilaren 21ean Biltokin jokatu zen Euskal Herriko Mus Txapelketaren kanporaketan. Bi bikotek lortu zuten Iruñeko Nafarroa mailako txapelketarako txartela, Imanol Retegi eta Iñaki Sein bikoteak eta Imanol Goienetxe eta Julen Aranburuk.