Aldi baterako administrari-ofiziala kontratatzeko jarraitu beharreko prozedurari ekin dio Udalak. Deialdian izena emateko epea zabaldu zuen lehendabizi –ilbeltzaren 31n bukatua– eta behin hori eginda, oposizio-lehiaketari emanen zaio hasiera. Hiru fasetan eginen da oposizio-lehiaketa: euskara proba lehenbiziko, lehiaketaldia gero eta oposizioaldia ondotik. Otsailaren 8an hasiko dira interesatuak euskara probarekin. Aurreikusitakoaren arabera, proba teorikoa eta praktikoa otsailaren 11n egin beharko dira eta proba informatikoa otsailaren 15ean.
Euskara proba
Ahoz nahiz idatziz euskaraz ongi jakitea baloratuko da, baina titulua edo baliokidea dutenek ez dute azterketa hau egin beharrik izanen. Bi froga izanen dira, ahozkoa eta idatzizkoa.
Lehiaketaldia
Merezimenduak baloratuko dira fase honetan: titulazioa, administrazio publikoan egindako lanak, prestakuntza ikastaroak...
Oposizioaldia
Hiru ariketa egin beharko dira. Lehendabizikoan, deialdian erabakitako gaien inguruko galdera labur edo test moduko galderei idatziz erantzun beharko zaie. Bigarrenean, berriz, bi ariketa praktiko egin beharko dira. Eta hirugarrenan, informatika proba eginen da.
Oposizio-lehiaketa gainditzen dutenen zerrenda kaleratuko du ondotik Udalak, eta punturik gehiena lortzen duen lehiakidea izendatzeko proposamena igorriko du. Proposamen hori iragarki oholean ere egonen da.
Aukeraketa eginda, 15 eguneko probaldia izanen du kontratuak.