Hotzari aurre eginez, San Antoneko erromeri jendetsua ospatu zen igandean Lesakako Endara auzoan.
Bortzirietatik eta Gipuzkoa aldetik hurbildutako hainbat lagunek parte hartu zuten igandean Lesakako Endara auzoko San Anton baselizaren inguruan ospatu zen erromerian. Sinestunek 10:00etan, 11:00etan eta 12:00etan meza aditzeko aukera izan zuten San Anton baselizan eta batzuk bere animaliak, zakurrak batez ere, eraman zituzten, ermitaren inguruan hiru itzuli emanez bedeinkatzeko.
Kanpoko aldean, trikitixa adituz eta dantzatuz, erroskillak eta taloak erosteko, dantzatzeko eta lagunartean trago bat hartzeko aprobetxatu zuen jendeak, goizeko hotzak kendu bidenabarkoan. Eguzkiak ez zuen indar handiegirik, baina pixkanaka lortu zuen behelainioa uxatzea eta neguko egun ederra gelditu zen, hotza baina eguzkitsua.
Herritik oinez joateko, mendi ateraldia antolatu zuen Beti Gazte elkarteak eta hogei bat lagun joan ziren taldean. Arratsaldean, behin herrira bueltatutakoan, dantzaldia izan zen plazan.