Udalak ahobatez babesa eman dio Tantirumairu ikastolari eta Otxogorrienea etxea guttienez 30 urterako uzteko akordioa lehenbailehen hartzea eskatu dio Cornelia Lecuona Fundazioko patronatuari, baita inguruan dituen lur-eremuak ere, etorkizunean egin nahi dituen zabaltze lanetarako. Tantirumairuk eta patronatu horrek 1990ean sinatutako kontratuaren bidez Otxogorrienea etxea erabiltzen du ikastolak, Cornelia Lecuona zenak, ikastetxe modura erabil zedin erakutsitako borondatea betez. Kontratu hau 25 urterako denez, 2015ean bukatuko da eta ikastolarentzat nahitaezkoa da kontratua luzatzea, instalazioen handitze lanak egiteko. Hauxe da Nafarroako Ikastolen Elkarteak jartzen duen baldintza 2015eko Nafarroa Oinez Lesakan antolatzeko.
Ikastolak zenbait berrikuntza lan egin baditu ere, ttikia gelditu da. Adibidez, 1990ean 7 ikaslek bakarrik erabiltzen zuten ikastolako jangela eta gaur egun 52 dira. Horregatik, ikastola eta futbol zelaiaren artean, frontoiaren segidan eraikitzeko aurreproiektua aurkeztua du ikastolak.
Ikastola eta Patronatuaren arteko harremanak ez aitzinera ez gibelera daude eta Tantirumairuk harreman horiei bultzada ematea eskatu dio Udalari, «afera lehenbailehen moldatzen ez bada, 2015eko Nafarroa Oinez ezin izanen baita Lesakan egin». Aferak kezka sortua zuen eta 200 lagun bildu ziren batzar-aretoan. Otxogorrienea eta inguruko lurrak bertze 30 urterako uztea Patronatuari eskatzeaz gain, Udalak Patronatuarekin negoziatzera jartzeko eskatu zion Tantirumairu ikastolari, bi aldeendako ona den akordio batera ailegatzeko.