Hainbat ekitaldi izanen dira Eguberrien atarian:
Ipuin Lehiaketako sari banaketa
Astelehenean, hilak 20, eginen da Bortzirietako haur eta gazteen ipuin lehiaketako sari banaketa. Herri Liburutegian izanen da, 18:00etan.
Bertso-saio didaktikoa
Euskara Batzordeak antolatuta, bertso-saio didaktikoa eginen da ortziralean, hilak 17, Beralandetan. Estitxu Arozena, Patxi Iriart, Beñat Gaztelumendi eta Julio Soto ariko dira bertsotan eta Karlos Aizpurua izanen da gai-jartzailea. 20:30ean hasiko da.
Antzerkia
Larunbat honetan, Kultur Batzordearen eskutik, El Kiosko antzezlana ikusgai, 20:00etan Kultur Etxean.
Kontzertuak
Isidoro Fagoaga Musika Eskolak Eguberrietako kontzertua eskainiko du Kultur Etxean hilaren 21ean, 17:30ean. Eta Berako Abesbatzak igande arratsaldean, San Jose zahar-etxean emanaldia eskainiko du eta urtea elizan kantatuz bukatuko du. Larunbat honetan Kultur Etxean bertze saio bat ere eskaintzekoa zen, baina azkenean, otsailaren 12ra gibeleratu dute.
Parkea
Haurrentzat Eguberrietako parkea paratuko du Larun Haizpe merkatari, ostalari eta zerbitzu enpresen elkarteak. Abenduaren 26tik 30era izanen da frontoian (11:00-13:30 eta 15:00-19:00). Eguneko sarrera 3 euro; bortz egunetakoa 10 euro.