Bortzirietako futbol zelaietan egindako lanak inauguratu zituzten azaroaren 12an. Horretarako, Berako eta Lesakako udal ordezkariekin batera, Beti Gazte eta Gure Txokoako presidente eta zuzendaritza batzordeetako kideak eta Nafarroako eta Gipuzkoako Futbol Federazioetako ordezkariak, Jose Luis Diez eta Juan Luis Larrea presidenteak izan ziren inaugurazio ekitaldietan.
Aldagelak Mastegin
Lesakako Mastegi futbol-zelaiko aldagela berrien inaugurazioa ekitaldi hunkigarria izan zen. Izan ere, Beti Gazte elkarteko lehenbiziko bazkideak, 95 urte dituen Justo Urkijo Bizkarguenagak, egin zuen zintaren mozketa. Beti Gazteko arroparekin jantzitako Olaia Iantzik eta Justoren birbilobek, Manex Larraldek eta Narroa Villalvak, zintari eutsi bitartean. Zinta moztu eta aldagelak inauguratutzat eman ondotik, Nafarroako Futbol Federazioko Felix Gonzalezek oroigarri bat eman zion Justo Urkijori, Federazioaren korbata, hain zuzen. Salvador Iantzi Beti Gazteko presidenteak ere elkartearen intsignia eman zion eta eskerrak eman zizkien, bi federazioei, Udalari eta Nafarroako Kutxari.
Argiteria Matzadan
Erregionaleko Gure Txokoa eta Beti Gazte Bren arteko derbiaren atarian egin zen Matzadako argiteriaren inaugurazioa. Argi berriak irailetik erabiltzen ari dira Beran, Gure Txokoa elkarteak, Udalak eta Gipuzkoako Futbol Federazioak sinatutako hitzarmen baten bidez. Gipuzkoako Futbol Federazioak osorik ordaindu ditu lanak, 90.000 euro inguruko inbertsioarekin, baina dirua kinielak sortzen duen irabazietatik bideratu omen da proiektu honetara. Angel Ponbar Gure Txokoako presidente gustura ageri da argiteri berriarekin, entrenamenduetarako eta partida ofizialen ordutegirako aukera zabalagoa eskaintzen duelako.
Behin bi instalazio horiek lortuta, belar artifizialan inguruko asmo berriekin dabiltza bai Beti Gazte eta bai Gure Txokoa ere. Beran belar artifizialeko futbol-zelaia egiteko asmoa dute eta Lesakan, abudo 14 urte beteko dituen belar artifizialaren ordez, berria jartzeko.