Hedatzen ari da etxeko konpostajea Bortzirietan. Datuek hala diote. 2008an egin zuen Hiri Hondakinen Mankomunitateak etxeko konposta indartzeko lehen kanpaina bortz herrietan eta arrakasta ikusita 2009an bigarrea egin zuen. Guztira 181 familia eta bi eskolak hartu dute parte. Baina urtea bukatzerako, gehiago izanen dira. Eskaera aunitz jaso direnez, Mankomunitateak, Nafarroako Partzuergoarekin, hirugarren fasean 110 konpostontzi gehiago banatuko baititu.
Sortzen den hondakinen kopurua murrizteko lanean ari da azken urteotan Mankomunitatea, etxeko konposta bultzatzen. Izan ere, etxean sortzen den hondakinen %40-45 organikoa da.