Joan den urtean bigarren gelditu zen Gonzalo Sukuntza andoaindarra nagusitu zen urriaren 23an Beran jokatutako XXX. Lizuniagako Igoeran. Eztegarako pilotalekutik Lizuniagako kaxkora bitarteko 4,9 kilometroak osatzeko 17 minutu eta 30 segundo behar izan zituen. Bigarren, Manttale taldeko Unai Santamaria hernaniarra izan zen (17:48) eta hirugarren iazko irabazlea, Antsoaingo Daniel Sanz (17:50). Denak ere, Abdelfatah Loujari marokoarrak 2008an egindako markatik (16:03) urruti gelditu ziren eta Gure Txokoa Elkarteak hurrengo urterako gorde zituen marka hori hobetzeagatik eskaini zituen 300 euroak.
Emakumezkoen artean, Maika Ariztegi iturendarrak ez zuen hutsik egin eta berriz ere irabazle izan zen, (22: 45). Aitziber Urkiolak (24:02) eta Marisol Martinezek osatu zuten podiuma. Beteranoetan, Angel Garate iruritarra nagusitu zen (18:37), Iñaki Bakedano (18:50) eta Ander Arrastio (19:06) gibelean utzita.
120 korrikalari
Markak marka, Lizuniagako Igoeraren konturik aipagarriena parte-hartzea izan zen. Guztira 120 korrikalari abiatu baitziren –iaz baino 29 lagun gehiago–. Horietako aunitz Gure Txokoa eta Manttale taldearen atletismo eskolakoak ziren.