Lan txukuna eginda, baina Nafarroako buruz burukoan txapelik lortu gabe gelditu da Beñat Oronoz Lesakako pilotaria. Izan ere, Joseba Ezkurdiak irabazi zuen urriaren 24an Nafarroako 22 urtez beheitiko buruz buruko pilota txapelketaren finala. Oberenakoak 18-9 irabazi zion Labriten Erreka taldeko Beñat Oronozi.
Lehenbiziko tantua Oronozek egin bazuen ere, abudo hasi zen nagusitzen Ezkurdia (4-1). Lesakarra 5-3ra hurbildu zen, baina 6-0eko partziala egin zuen Oberenakoak 11-3 jartzeko. Hortik aitzinera aldeari nahiko aisa eutsi zion faborito zen Ezkurdiak (11-4, 12-6, 14-7, 15-9 eta 18-9).
Bai Ezkurdiak, bai Oronozek, beraien sake gaiztoan oinarritu zuten jokoa: Oberenakoak sei tanto egin zituen hasierako jokaldiarekin eta Errekakoak lau. Biei ere urduritasuna nabarmendu zitzaien, baina batez ere tantu ikusgarriak egin zituzten. Izan ere, joan den urtean jubenil mailako txapela irabazi ondotik, lehenbiziko urtea zuen kategorian Oronozek eta finala galdu arren, txapelketa bikaina egin du lesakarrak.
Iaz 18 urtez beheitikoetan
Oronozek jubenil mailan Nafarroako buruz buruko txapelketa irabazi zuen iaz, GRAVN txapelketan azpitxapeldun izan zen eta binaka ere zenbait txapel irabazi zituen.