Atal honetan lehendik aipatua bada ere, informazio zehatzagoa Udalak etxeetara bidaltzen duen orri informatiboan agertu du. Nafarroako Gobernuko Abeltzaintza Azpiegituren Departamentutik jasotako dirulaguntza zenbait auzotako pistak moldatzeko aurrekontu osoaren %60 da, eta gainerako %40 Udalak hartuko du bere gain. Hauek dira hobekuntza lanak eginen diren tarteak eta aurrekontuak:
Azkilarrean
Arbikoerreka aldean urbidea paratu eta garbiketa lanak eginen dira (1.781,47 euro). Arruneko Bordako kurban, hodi berria sartu eta eskoilera ttiki bat eginen da (3.088 euro) eta Beraskunerako bidean urbide batzuk eginen dira (4.858,80 euro).
Eguzkialdean
Zerradoko kurban tubo berria sartu eta hormigoia bota (4.400,56 euro) eta Aranibar alderdian tubo berria sartuko da (999,84 euro).
Bertze lanak
Bertze lan batzuk ere diruz lagunduak izanen dira, baina partikularrek bere gain hartu beharko dute subentziotik kanpo gelditzen den zatia. Hori da, adibidez, Egusutako pistako zati batzuetan zabor-legarra botatzearen kasua (806,76 euro) edo Meakatik Andresenkobordara doan bidean errepaso lanak egin eta tubo batzuk sartzearena (15.338,59 euro). Azken hau zehaztu gabe dago oraindik, auzotarrekin egon eta beraien interesen arabera erabakiko da egin ala ez. Interesa duenak Herriko Etxera jo beharko du.
Lanak Sasoi enpresak eginen ditu. Esleipena %30 inguruko deskontuarekin egin da eta lanen erdiak azaroaren erdialderako zertifikatua egon beharko du.
Ehiztariek eskatuta, berriz, Ekaitzako pistan hormigonatze lanak egin dira. Hiru erreka zokotan tuboak moldatu dira eta Primitibon txabolatik goiti pista zati batzuk ere hormigonatu dira. Ubiria enpresak 30.705 eurotan egin ditu. Kopuru horretatik %65 Nafarroako Gobernuko dirulaguntzatik ordainduko da eta gainerakoa Ehiztari Elkartearen gain joanen da. Udalak, bere aldetik, tubo bat moldatzeko gastua eta erortza batzuen garbitze lanak bere gain hartu ditu. Obraren zuzendaritza lana Basartea enpresak egin du.