Hasierako aurreikuspen beltzak ez ziren bete eta irailaren 17an egindako batzarrean, zuzendaritza batzordea berritzea lortu zuen Gure Txokoa elkarteak. Egia da ez zela bazkide aunitz bildu: 1.300etik 30 bat bertzerik ez. Baina joan zirenak lanerako gogoz bildu ziren eta batzuk, gaur egungo batzordeari erreleboa emateko prest. Honela, heldu diren lau urteetan Angel Ponbar izanen da Gure Txokoako presidentea; Angeltxo Aranibar eta Jabier Etxegarai presidenteordeak; Aloña Lasaga eta Jorge Arakues izanen dira idazkariak eta Ainhoa Irazoki diruzaina.
Hauek izan dira lau urteotan aritu diren batzordekideen egiteko batzuk: elkartearen 75. urteurrena, Iamoteneako erreforma, Matzadako argiteria berria, hobekuntzak ostatuan... Futbol talde berriak ere sortu dira eta dantza taldearen antolakuntza ere nabarmendu daiteke. Denbora honetan, lanean aritu direnei ere eskerrak eman nahi izan dizkiete: Luis Irazoki, Luis Mari Retegi, Joseba Lasarte, Maria Barredo, Jon de la Kruz, Aritz Perez, Lurraren Eguneko lan taldea, Patxi Pikabea, Sabino Gomez...