Herrian barna oinez edo bizikletaz mugitzeko neurriak proposatzen dituen Mugikortasun Plana aurkeztu du Udalak. Crana Nafarroako Ingurumen Arloko Baliabideen Zentroak eta Udalaren arteko lankidetza izan da mugikortasuna hobetzeko plan hau abian paratu duena eta Iruñeko Oraintxe enpresak idatzi du. Helburua argia da: oinez eta bizikletaz herrian ibiltzeko neurriak proposatu eta praktikan paratzea da. Irailaren 17an egin zen itunaren aurkezpena Herriko Etxean, baina gizarte eragileek asteotan hartzekoak dira idatzia, sina dezaten eta Udalak irail hondarreko batzarrean onartzea espero da.
30 kilometro orduko gehienez
Herrigunean oinez edo bizikletaz ibiltzea sustatzeko neurri nagusien artean, herrigune osoan ibilgailuen gehieneko abiadura orduko 30 kilometrora mugatzea aurreikusi da. Oinezkoen eskubideak auto gidarien eskubideen gainetik paratu nahi dira horrela.
Horrez gain, erosketak egitea errazteko eta egun osoan autoa bertan ez uzteko helburuarekin, Altzateko Plazan eta Kanttonberrin gehienez ordu eta erdiz aparkatzeko baimena utziko da. Bertze zenbait neurri ere proposatuko dira Ituneko ekintza planean, hala nola, kiroldegi aitzinean bizikletendako aparkaleku estalia egitea, oinezkoen ibilbideei espaloi bidez jarraipena emateko estudioa egitea edo Bortzirietan autobus zerbitzu mankomunatua gauzatzeko Udalak gestioak egitea Nafarroako Gobernuan.