Bortzirietako Euskara Mankomunitateak 20 urte bete ditu aurten eta urteurrena ospatzeko, Mankomunitatearen Eguna antolatu dute urriaren 31rako Beran. Horrela iragarri zuten bortz herrietako euskara batzordekideek irailaren 22an Beran egindako prentsaurrekoan.
Agerraldian, Mentxu Peña Arantzako batzordekideak mankomunitatearen 20 urteko ibilbidea laburtu zuen: «Ofizialki 1990eko maiatzaren 18an sortu zen, egun horretan onartu baitziren estatutuak, eta batzordeak sortu. Halere, aitzineko urteetan egindako lana ezinbertzekoa izan zen mankomunitatea sortzeko». Gaineratu zuenez, «euskararen aldeko giroa eta gogoa indartzen ari zen: euskarazko irakaskuntza, helduen euskalduntze eta alfabetatzea, TTIPI-TTAPA hiru-hilabetekaria...». Testuinguru horretan hasi ziren biltzen Bortzirietako hainbat euskaltzale, euskararen aldeko lana eginen zuen tresna eta baliabideak eskainiko zituen azpiegitura bat sortzeko. Bizpahiru urteko gogoetaren ondotik, eta udalekin elkarlanean, Bortzirietako Euskara Mankomunitatea sortu zuten. Geroztik, mankomunitateak Bortzirietako arlo guztietan eragin nahi izan du: kulturan, familian, administrazioan, irakaskuntzan, ekonomian... helburua arlo guzietan euskarari sarbide ematea eta hizkuntzaren egoera normalizatzea baita. Arantzako batzordekideak erran zuenez, «zalantzarik gabe, euskarak aitzinera pausoak eman ditu 20 urteotan».
Halere, «euskarak Bortzirietan bide luze omen du egiteke», eta horretan lanean behar bezala aritzeko mankomunitateak ongi hornitua egon behar duela nabarmendu zuen Peñak; «ongi hornitua giza baliabideekin –batez ere herritarren parte-hartzearekin–, eta ongi hornitua baliabide ekonomiko eta materialekin.
EGITARAUA
Mankomunitataren Eguna
Urriaren 31ko behin betiko egitaraua oraindik prest ez badago ere, zenbait ekitaldi zehaztuak daude:
• 11:00etan, Mukixuko zubitik Matzadara abiatu eta irudiaren ekitaldia. Futbol zelaian, 350 lagunekin logotipo erraldoia osatu nahi da, airetik irudiak hartzeko. Bortzirietako euskaltzaleei dei berezia egin zaie ekitaldi honetan parte hartzeko.
• 12:30 aldera, martxa jendetsua Matzadatik Altzatera. Bortzirietako hainbat taldek parte hartuko dute (musikariak, dantzariak…).
• 13:00etan Altzateko plazan ekitaldia: Mankomunitatearen aldeko adierazpena irakurriko da. Ekitaldi horretan bertsolariek, bandek eta bertze zenbait taldek parte hartuko dute.
• 14:00etan herri-bazkaria, Altzateko frontoian. Txartelak ohiko tokietan edo batzordekideengana joanez eskuratzen ahal dira. Helduen bazkariak 15 euro balio du, eta haurrenak 6 euro.
• Arratsaldean haurrentzako tailerrak, helduentzako jokoak eta zozketak, musika eta berbena izanen dira.