Nafarroako Organorako Musika Zikloaren 26. Edizioaren barrenean, eskualdeko organ ondareari buruzko solasaldia eta mahaingurua eginen da irailaren 24an, ortziralean 19:30ean Lesakako San Martin elizako koruan. Solasaldi honekin Nafarroa osoan eta eskualdeari dagokionez, Beran eskainitako kontzertuak osatzen dira. Nafarroako Gobernuak, Nafarroako Organoaren Lagunen Elkartearekin batera antolatu du ekitaldia.
Baztan-Bidasoa osoan garrantzi handia dute organoek, baina oraindik gehiago eman nahi zaie, “ez bakarrik behar duten organoak zaharberrituz, baita organojoleak formatuz ere” diote antolatzaileek.
Ortziral arratseko mahainguruan, Jon Abril Berako kultur zinegotzia; Esther Iñiguez organojolea; Oscar Laguna, Gerhar Grenzing organogintza tailerreko kidea eta Aurelio Sagaseta, Iruñeko katedraleko kaperako maisua izanen dira. Kultur ondare honi buruz solastuko dute lauek, baina joaten den edonork parte hartu ahal izanen du solasaldian.