Aurtengo besta egitarauak zazpi egun hartzen ditu. Iraileko azkeneko asteburuan hasiko dira igantziarrak motorrak berotzen bertso afari eta Artzain Zakur Txapelketarekin eta, hurrengo larunbatean, urriak 2, akabera emanen diote 2010eko San Migelei. “Bai, aurten hola tokatzen da. Batere ustegabean, bata eta bertzea kontatzen hasi eta, azkenean, zazpi egunetan bada zerbait. Tartean, astelehenean ez da deus, 28a bezpera da eta 25 eta 26a ere ez dira besta osoko egunak, baina tira, ez dakit aunitz edo gutti den baina azkenean zazpi egunetan bada zerbait”. Izan ere, aurten San Migel eguna asteazkenerakin suertatzen da eta, holakoetan, pixka bat “arraroagoak” izaten direla aitortzen digu Iñaki Goienetxek, Igantziko alkateak. “astegunetan kanpotik ez da jende aunitz etortzen eta, normala den bezala, gazteek eta ostatuek nahi izaten dute asteburutan zerbait izatea”.
Bertze urtetan bezala, hiru egunetan izanen dituzte bertsolariak; bertso afarian, bertso pilotan eta bertso bazkarian. “Joan den urtean herri kirolak eta bertsolariak egin ziren baina, beharbada, erritmoa hautsi zen pixka bat eta, aurten, bertso pilotara itzuli gara berriz. Gero bertso afaria izaten da, gazteak antolatua, eta baita bertso bazkaria ere, Sustrai Colina eta Egañarekin. Gainerakoan, ilunabar-gaueko musika eta dantzaldietan somatuko da aurten aldaketa. Egunero musika taldeak ekarri beharrean konponbide merkeagoak bilatu dira. “Arrazoia ekonomikoa da. Taldeak gosta egiten dira pila bat eta, araberan, uste dugu ez zaiela hainbertze probetxurik ateratzen. Gazteek ere gauza beretsua erraten dute eta, aurten, gisa honetara probatuko dugu. Bi egunetan DJak ekarriko ditugu, bertze batean Joxe Angel, bertzean Modesto eta ortziral arratsean bertze talde batzuk. Aurten honela probatu eta ikusiko da”.
Aspalditik, bestatako programan toki fijoa izaten dute Artzain Zakur Txapelketak eta Gazta Lehiaketak. “Artzain Zakur Txapelketarekin Bertiz Partzuergo Turistikoak laguntzen digu eta Gazta Lehiaketara 12-13 gazta presentatzen dira”. Alabaina, alkatearen ustez jende gehien biltzen duena herri kirola izaten da. Urriaren 2an Euskal Herriko Lehen Mailako Arpanlari Txapelketa izanen da eta, ondotik, herritarren arteko desafioa.
Aurrekontuaz galdetuta“24.000 euro inguru” joanen direla pentsatzen du Goienetxek. “Ez gara gauzak izugarri murriztera joan. Izatekotan, luntxak, gonbiteak, musika, profesionalen pilota partidak… holakotan xuabego ibili gara baina, generalean, mantentzen saiatu gara”. Hori bai, aurten ere su artifizialak izanen dira, “eta debalde gainera!”.