Inguruko ikastetxe aunitzetan bezala, herriko eskolan joan den astean hasi zen ikasturte berria. Irailaren lehenean maixuak lantokira itzuli baldin baziren ere, eskolako umeak irailaren 6an hasi ziren.
Aurten 49 ikasle daude eta Eneko Zulaika Iturria 3 urteko ikasle bakarra hasi da eskolan. Gainerakoan, iazko sei irakasleez gain, Nerea Alejos irundarra eta Aitor Elexpuru bizkaitarra irakasle berriak batu dira taldera.
Hilabete honetan goizez bakarrik izanen dute eskola eta jantoki zerbitzua ere joan den astetik dago martxan.
Guraso Elkartea
Eskolako Guraso Elkarteko junta irailaren 3an berritu zen. Ikasleen guraso guziak bilerara deituak izan ziren batzordea berritzeko eta bertze gaietaz solasteko. Gutti bildu baziren ere, juntako hiru ordezkari berri aukeratu ziren. Bozkatuenak Fabiola Taberna, Pili Larretxea eta Maixe Oskoz izan ziren. Horrela, bi urtez juntan egon diren Beatriz Taberna, Josune Otxandorena eta Koldobike Gorostiza ordezkatu dituzte.
Lehendakari, eskola kontseiluko eta ikasleen ordezkari karguak nork beteko dituzten hurrengo asteetan erabakiko da.
Hiru ordezkari berriez gain, Sonia Iturria, Beatriz Iparragirre, Pili Telletxea eta Arantxa Otegi juntako taldean mantenduko dira.
Pelettiki haur eskola
Pelettiki Haur Eskolako lagunak ere ikasturtea abiatu dute. Iazko Maddalen eta Kattinek Iraide eta Oierrekin jostatzeko eta gauza aunitz egiteko aukera izanen dute aurten, azken bi neska-mutikoak haur eskolan hasi baitira. Beranduxeago Elene, Asier eta Haizea ere eskola ttikiko taldera batuko dira.