Hasiera batean, hilabete honen hasieran hastekoak ziren zerbitzu anitzetako langilea aukeratzeko azterketak. Baina azkenean, urrian abiatuko dira, euskara azterketarekin. Hori izanen da lanposturako lehendabiziko froga, eta ondotik, azterketa teorikoa eta praktikoa eginen dira.
Deialdi honetarako epaimahaia horrela osatua egonen da: mahaiburua alkatea izanen da eta honen ordezkoa alkateordea; kide bat zinegotzia izanen da eta bere ordezkoa ere zinegotzia. Bigarren kidea Nafarroako udal eta kontzejuek izendatutako teknikaria izanen da eta ordezkoa ere halaxe izanen da; Cederna Garalurrek izendatuko ditu hirugarren kidea eta honen ordezkoa; Berako Toki Ona Institutuko irakasle bat izanen da bertze kidea, eta honen ordezkoa bertze irakasle bat. Idazkaria herriko idazkaria izanen da, eta ordezkoa, Etxalarkoa.
Guzira 17 lagunek eman dute lanposturako izena eta urte bukaerarako langile finkoa lanean hastea espero da.