Zuzendaritza Batzordea aldatzeko estatutu berriak onartu ondotik, irailaren 17an eginen dira Gure Txokoa elkarteko zuzendaritza berritzeko hauteskundeak. 20:00etarako egin dute deialdia. Egun horretan ez bada talderik aurkezten, bi asteko epea izanen da eta berriro ez bada inor aurkezten, Kudeaketa Batzordea osatuko da.
Parte-hartze eskasa
Uztailean egindako ezohiko batzarrean erabaki zen estatutuak aldatzea. Dena den, gaia garrantzitsua izanik ere, elkarteak dituen 1.300 bazkideetatik 26 bertzerik ez ziren bildu.
Proposatu ziren aukeren artean, lehenbizikoa izan zen bozkatuena, 20 botorekin. Hala, hauteskundeak deitu eta hautagairik aurkeztuko ez balitz, edo aurkeztutakoak aukeratuak aterako ez balira, une horretan elkarteak dituen bokalia bakoitzeko ordezkari banarekin osatutako Kudeaketa Batzordea osatuko litzateke.
Batzorde honen agintealdia gehienez urtebetekoa izanen da eta denbora horretan, egokia baderitzo, hauteskundeak deitzen ahal ditu. Epe hori betetzen denean, prozedura berarekin batzorde berria izendatuko da eta aitzineko agintaldikoek ere, segitzeko aukera izanen dute.
Uztaileko batzarrak izan zuen arrakasta eskasa ikusita, gaur egungo zuzendaritzatik gogorarazi dute Gure Txokoa bazkide guziek osatzen dutela, eta ez batzuek bakarrik.