Bertze urte batez, Arantza Rock jaialdia antolatu du Arantzako Gazte Asanbladak. Larunbat honetan, abuztuak 21, eginen da, bestak akautu eta hurrengo larunbatean. Ohi bezala arratseko kontzertuak izanen dira eguneko ekitaldi nagusiak eta aurtengoan Errugabe (Doneztebe eta Amaiurko taldea), Bad Sound System (Irun aldekoa), Vendetta (Iruñea) eta Ze esatek! (Gipuzkoa) musika taldeak gonbidatu dituzte. Euren doinuak nagusituko dira 23:00etatik aitzinera plazan.
Lehenagotik, 19:00 aldera, karrikaz karrika poteoa izanen da, eta arrats guztian pintxoak, bokatak, Gazte Tonbola, txosna eta abar izanen dira. Jatekoa, aldi honetan, Guraso Elkarteak eskainiko du.
Aurtengo edizioko metxeroak eta kamisetak ere salgai daude azken asteotan, eta Arantza Rock 2010 egunean ere izanen da erosteko aukera.