Beheko Pisuetako besten ondotik, herrikoak begi bistan ditugu. Amabirjin bezperan hasi eta asteartean akautuko dira, eta egun horietan zer izanen den hurrengo alean jasoko dugu. Halere, Gazte Asanbladak abuztuaren 13rako eta 21erako besta egunak antolatu ditu. Abuztuaren 13an, bestak girotzeko zer egina izanen da, oraindik egitaraua finkatzeko badago ere. Abuztuaren 21ean, larunbatarekin, berriz, Arantza Rock 2010 iraganen da.
Ilunabarrean, 19:00etatik aitzinera, triki poteoa izanen da eta Arantzako batukada taldeak karriketan barna kalejira eginen du. Eta arratsean, 23:00etan hasita, plazan, Errugabe (Doneztebe eta Amaiurko taldea), Bad Sound System (Irun aldekoa), Iruñea aldekoa den Vendetta eta Ze esatek! gipuzkoar musika taldeek kontzertua eskainiko dute. Arratsaldetik aitzinera, pintxoak, bokatak, gazte tonbola, txozna eta abar ere izanen dira.
Metxeroak eta kamisetak
Aurtengo edizioko metxeroak salgai daude eta kamisetak bidean dituztela erran digute Gazte Asanbladatik. Hamar bat lagun ari dira guztia josten, eta joan den urteko arrakasta ikusita, seguru aurten ere ongi aterako dela.