Hirigintza Planean aldaketa nabarmena ekarriko duen proposamena egin du Udalak: lurrak urbanizagarri eta ez urbanizagarrietan bereizi nahi ditu.
Orain arte, herrigunea eta herrigunetik kanpoko lurretan sailkatuak zeuden, baina herrigunetik kanpo 1.500 metro koadroko eremua edukiz gero, etxebizitza egiteko aukera bazegoen. Azken aldian, ordea, jende andanari ukatu zaio etxebizitza egiteko baimena herrian, eta horren harira, hartu du Udalak Hirigintza Planean aldaketa egiteko bidea.
Momentuz behin behineko proposamena baino ez da, eta prozedurarekin aitzinera egin baino lehen jendaurrean egonen da abuztuaren 31ra arte, herritarrek ikusi eta ekarpenak egin ditzaten. Ez bada deus aurkezten, orduan hasiko da tramitazioarekin.