Lehen hitza euskaraz, San Juan bezperako jaialdian

Joan den urtean bezala, aurten ere San Juan bezperan ospakizun berezia plantatu zuen Euskara Batzordeak. Iazkoan, Badakizue, egizue izan zen egunerako hautatutako leloa, eta aurten Lehen hitza euskaraz. Helburu horrekin, lehenik Euskara Batzordeko kideak  akordeolari taldearen laguntzarekin Plaza Be­rria eta Antoiu karriketan barna ibili ziren, etxeen izenak paratzen. «Gure etxeak euskaraz, euskara gure etxea» esaldiaren azpian, gutti erabil­tzen diren eta batzuetan ezagutzen ez diren etxeen izenak ageri ziren. Gero, komentuko belagian bildu zen jendea, bertso eskolako gaztetxoek, abesbatzak eta Etnia taldeak eskainitako jaialdian parte hartzera. Dagoeneko lehen suak piztuak zeuden, eta neska-mutikoak batean eta bertzean saltari zebiltzan, baina oraindik arratseko bertze sorpresa bat ere bazen, ezpatadantzarien taldeak San Fermin eguneko entsaioa hantxe bertan egin baitzuten, suaren inguruan.