Berako Altzate auzoko bestak ospatu dira asteburu honetan eta eguraldi euritsuari aitzin eginez, giro ederra izan zuten ortziraletik igandera antiolatutako ekitaldian
Ortziralean poteo-tapeoa izan zen bestak hasteko, hau da, Altzateko ostatuetan, kontsumizio batekin tapa doan izan zuten bezeroek. 20:00etan altxaferoa bota zuten eta erraldoiak, buruhandiak eta gaiteroak ibili ziren Uraldea karrikan barrena. Ortziral gaua, berriz, Hippy Gaua izan zen eta musika eta mozorroak gai horren ingurukoak izan ziren
Larunbat eguerdoam erraldoiak eta buruhandiak atera ziren, gaiteroekin batera. Zikiro jatearen ondotik, larunbat arratsaldean euskal dantzen erakustaldia egin zuen Gure Txokoa dantza taldeak Altzateko Plazan, argazkian ageri denez. Dantzaldia izan zen eta atsedenaldian suzko zezena ibili zen Altzate karrikan.
Igandean ere hainbat ekitaldi izan ziren: plater tiraketa, herri kirolak, bonba japoniarrak, haur jokuak, Dance-Jazz erakustaldia… Altzateko komertzioetako erakusleiho lehiaketako sariak eman ziren eta saskiaren zozketa ere egin zen. Auzo afariarekin akautu zituzten Altzateko bestak.