Greba mugagabean segitzen duten Berako Savera lantegiko langileak ez daude geldi egoteko eta ekainaren 22an, astearte goizean bertze mobilizazio bat egin zuten. Hain zuzen, ehun grebalari baino gehiagok Irun-Hondarribia aldera jo zuten, Oarso-Bidasoako ELAk antolatuta, Hondarribiako Amute auzotik Irun erdialdera joan zen manifestazioan parte hartzeko.
Saverako langileen erditsua ELAk antolatutako autobusean joan ziren Beratik Hondarribiara, eta bertze erdia bizikletan, despidoen kontrako kartelak azalduz, N-121-A errepidean barna.
Hondarribiako Amute auzoan Gipuzkoaldeko ELAko delegatuak zituzten esperoan, lehenik batzarra egin baitute bertan eta gero, elkartasuna adierazi diete Saverako langileei. Elkarrekin joan ziren 11:30ean hasi zen manifestazioan, "Despidorik ez, lana hemen eta ez Txinan" zioen pankartaren gibeletik.