Ortzegun honetan, maiatzak 27, Uraren inguruko auditoria eta Bidasoa ibai-lurraldearen kudeaketa planaren lehenengo partehartze tailerra ospatuko da Beran, egitasmo honen inguruko Diagnostikoaherritar, talde edota interesa duten eragileen aurrean aurkezteko. Lehengo mataderoan, Belandeta Erabilera Anitzeko Egoitzan (Kultur Etxearen ondoan) izanen da hitzordua 19:00etan.
Tailer honen helburua udal instalazioen egiten den uraren erabilerari eta Bidasoa ibaiaren egoerari buruzko iritzi edota kezkak jasotzea da, etorkizunerako neurriak zehaztu ahal izateko.
Martxoaren 25eko aurkezpenean bertara hurbildu zirenek uraren kudeaketak beratar guztiontzat duen garrantzia azpimarratu zutela gogoan izanda, Nafarroako Gobernuko Ura Zerbitzuak, CRANA Fundazioak eta Berako Udalak tailer honetan parte hartzera gonbidatu dituzte beratarrak.
Berako Udalak, Nafarroako beste 6 Udalekin batera, elkarlan hitzarmena sinatu zuen CRANArekin (Nafarroako Ingurumen Aldeko Baliabide Zentroa) 2010ean, udal instalakuntzetan ura aurrezten lagundu eta ibai eremuaren egoera berreskuratu edota hobetu dezaketen esperientzien garapenari ekiteko. Hitzarmen hau “Europa Hego-mendebaldeko Uren eta Ibaien Tokiko Kudeaketa Partehartzailea” deritzon Sud’eau europear egitasmoaren baitan kokatzen da.
Berako uraren egoerari egindako lehen diagnosiaren arabera, Nahiz eta Bera eta bere inguruak oso euritsuak izan, Beran noizbehinka ur-falta egoteak agerian uzten du uraren kudeaketa eta erabilera ez dela ez egokia ez eraginkorra. Eraginkortasun falta hau nabaria da uraren ziklo osoan (ur-bilketan, edateko uraren arazketan, biltegiratzean, banaketan, kontsumoan, saneamenduan, eta isurketan). Beran uraren zikloaren eraginkortasuna hobetzeko, besteak beste, zikloa osatzen duten osagai guztiak diagnostikatu egin behar dira. Horrela arazoak detekta eta kuantifika daitezke eta ondorioz prozesua bere osotasunean hobetzeko aukera izango dugu. Hau lortzeko, Kontsumo-guneak aztertzeko tresnarik praktikoena ekoikuskapenak egitea da. Beran, Lehen hezkuntzako Ricardo Baroja ikastetxean, udal kiroldegian, futbol zelaian eta udako igerilekuetan egin dira ekoikuskapenak.