Eskolan egin duten mediateka herritar guztien eskura paratu nahi dute

Liburuak, bideoak, DVDak, CDak, aldizkariak, ordenagailuak... Denetarik aurki daiteke eskolako mediaketa berrian. Momentuz eskolakoen eskura dago, baina zerbitzua herri osoari eskaintzea da asmoa.
Irakurketaz gozatu eta liburuak zaindu, mediateka baten antolakuntza eta erabilera ezagutu eta mediateka informazio-iturri gisa erabiltzeko helburuarekin hasi ziren irakasleak proiektua gara­tzen. Eta ikasleekin eta gurasoekin elkarlanean egin dute, aitzinetik ber­tze tokietako liburutegien funtzionamendua nolakoa den ikasita. Behin hori eginda, bigarren eta hirugarren zikloko ikasleak funtzionamendua zehaztu eta ia 2.000 liburu sailkatu dituzte. Lehen zi­klo­koak eta Haur Hez­kun­tzakoak, berriz, apain­ketaz arduratu dira, eta irakasle eta gurasoak libu­ruak ordenagailuan ka­taloga­tzeaz.
Egindako lanak, gainera, saria ekarri du. Nafarroako Gobernuak irakurketa indar­tzeko antolatutako sariketan, 250 euro eman baitizkio eskolari. «Saria ongi etorri zaigu liburu batzuk erosteko», aipatu digute eskolakoek. Baina gaineratu dutenez, «orain arte 1.000 liburu baino ez ditu­gu katalogatu» eta denen lagun­tzarekin, lan guztia heldu den urtean akau­tzea espero dute.
Emaitzarekin gustura daude: «sekulako lana egin dugu». Gainera, euren irudiko, «ikasleek, izuga­rrizko motibazioarekin ekiten diote irakur­tzeari eta dudarik ez egin, ikasterakoan lagungarria izanen zaiela».