Tantirumairu Euskal Folklore Taldeak Lesakako Udalaren laguntzaz antolatutako Tantirudantza jaialdia giro ederrean ospatu zen igandean, apirilaren 25ean. Eguraldi eguzkitsua eta goxoa lagun, goizean, ongietorria eta hameketakoaren ondotik, Urretxuko Lurra, Getariko Gure Txeru eta Faltzesko Makaia taldeetako dantzari ttikiak, herriko Tantirumairukoekin batera, karrikaz karrika ibili ziren, Lesakako txoko ezberdinetan beraien dantzak eskainiz. 12:45ak aldera, Lesakako dantzarik tipikoena, “Zubigainekoa” eskaini zioten herriko dantzariek bisitariei eta gero plazan bildu ziren talde guziak, beraien emanaldia eskaintzera. Bazkaltzeko, herriko dantzarien etxeetara joan ziren bixitan etorritako dantzari ttikiak eta arduradun eta musikariek, berriz, elkarrekin bazkaldu zuten.
Arratsaldean, Patxin eta Potxin pailazoek emanaldia eskaini zuten plazan, aurtengo Tantirudantza jaialdiari bukaera emanez.